بیر۔
(jujuba Fruit)
دیگرنام۔
پھل کو نبق جبکہ درخت کو سدر فارسی میں کنار بنگالی میں گل پھل گجراتی میں بورجبکہ انگریزی میں جوجوبی فروٹ کہتے ہیں۔
ماہیت۔
مشہورعام درخت کاپھل ہے جنگلی اور باغ والا ۔باغ والے کو بیری (سدر)اور جنگلی کوجھٹربیری کہتے ہیں۔بیر کا رنگ سرخ زرد اور سبز جبکہ ذائقہ شیریں اورترش ہوتاہے۔
پھل کے لحا ظ سے بھی بیر کی دو اقسام مشہور ہیں۔
ایک بیر چھوٹا جوکہ گول سرخ رنگ کاہوتا ہے جس کی اوپر والی جلدجھری دار ہوتی ہے۔دوسرا بیربڑا بیضوی طرح کا ہوتاہے۔اس کو کاٹھایا پینڈو بیر بھی کہاجاتا ہے۔یہ سبز اور زرد رنگ کا ہوتا ہے۔
مزاج۔
سرد خشک درجہ اول۔
استعمال۔
بطورپھل کھایاجاتا ہے دیر ہضم قلیل القدااورصالح الکمیوس ہے۔صفرا اور خون کے جوش کو تسکین دیتاہے پیاس کو بجھاتاہے گرم مزاجوں کیلئے نہایت موافق ہے ۔بیرکوبھون کردست اور پیچش کیلئے استعمال کرتے ہیں۔پوست بیری کا برردہ خون کے سیلان کوبندکرتاہے۔پتوں کو لیپ ورم حار مفید ہے۔پتوں کے جوشاندے سے سر دھونابالوں کوقوت بخشتا ہے اورسرکی بھوسی دور کرنے کیلئے مفیدہیں۔جنگلی بیروں کو جن میں ہنوز گٹھلی نہ پڑی ہو سایہ میں خشک کرکے سفوف بناتے اور جریان خون کھلاتے ہیں۔درخت جھڑبیری کی جڑ کی چھال کو بھی جریان و سیلان الرحم میں استعمال کرتے ہیں۔اور اس کے جوشاندے سے قلاع غرغرے کراتے ہیں۔جنگلی بیری کی جڑ دس گرام کالی مرچ سات عدد پانی میں گھوٹ کردن میں تین بارپلانا پیچش ومروڑ کا عمدہ علاج ہے۔
نفع خاص۔
مسکن حرارت ،دافع صفراء ۔
مضر۔
دیرہضم۔نفاخ۔
مقدارخوراک۔
بقدرہضم بطوردواء معالج کے مشورے سے استعمال کریں
